ടെറസ്സിൽ ഒരു കൃഷിപാഠം; അദ്ധ്യായം1

വിളവെടുപ്പ് കഴിഞ്ഞാൽ ചട്ടിയിലേക്ക്

                       ‘കറിവെക്കാൻ നേരത്ത് സ്വന്തം മട്ടുപ്പാവിൽ, സ്വന്തമായി നട്ടുവളർത്തിയ ചെടികളിൽ‌നിന്ന്, ഫ്രഷ് ആയ പച്ചക്കറികൾ പറിച്ചെടുത്ത് ഉപയോഗിക്കുക’, അതാണ് ‘ടെറസ്സ് കൃഷി’ കൊണ്ടുള്ള നേട്ടം. സ്വന്തം പരീക്ഷണ നിരീക്ഷണങ്ങളിലൂടെ നമുക്ക് ആവശ്യമുള്ളതും നമ്മൾ ഭക്ഷിക്കുന്നതും മാത്രം ഉത്പാദിപ്പിക്കുകയാണ് ഇവിടെ ചെയ്യുന്നത്. 
            സ്വന്തം‌വീട്ടിലെ മട്ടുപ്പാവിൽ സൂര്യപ്രകാശമേൽക്കുന്ന ഇത്തിരി സ്ഥലത്ത് മാത്രം കൃഷിചെയ്യുന്നതിനാൽ അമിതമായി  ചെടികൾ വളർത്തി, രാസവളവും കീടനാശിനിയും ധാരാളം കലർത്തി, കൂടുതൽ പച്ചക്കറികൾ ഉല്പാദിപ്പിച്ച്, വില്പന നടത്തി മറ്റുള്ളവരെ വിഷം‌തീറ്റുന്ന പരിപാടി ഇവിടെ നടക്കില്ല. 
പിന്നെയോ,,,

ഒരു ദിവസത്തേക്ക് ഇത്രയും പോരെ?

                   ഇവിടെ പറയുന്നത് ചെറിയ തോതിലുള്ള വീട്ടാവശ്യത്തിനുള്ള പച്ചക്കറി കൃഷിയെകുറിച്ച് മാത്രം. ടെറസ്സിൽ സ്ഥിരമായി ധാരാളം മണ്ണ് സംഭരിച്ച്, ജലസേചനം നടത്തിയിട്ട് വലിയ വൃക്ഷങ്ങളും ദീർഘകാലവിളകളും കൃഷി ചെയ്യാറുണ്ടെങ്കിലും (ഉദാ: പേര, വാഴ, നാരകം, പപ്പായ തുടങ്ങിയവ) അത്തരം കൃഷിയെക്കുറിച്ച് ഇപ്പോൾ പറയുന്നില്ല്ല.

ഇത് നമ്മൾ നമുക്കുവേണ്ടി നമ്മുടെ വീട്ടിൽ നമ്മളാൽ ചെയ്യുന്ന കൃഷി.

ഇനി ഒരു പഴയ ഓർമ്മ,,,

        വർഷങ്ങൾക്ക് മുൻപ് നമ്മുടെ സ്ക്കൂളിൽ അദ്ധ്യാപകരുടെയും വിദ്യാർത്ഥികളുടെയും മനസ്സിൽ കൃഷിയെകുറിച്ചുള്ള ആശയത്തിന്റെ വിത്ത് പാവിയ, സ്ക്കൂൾ പച്ചക്കറികൃഷിക്ക് തറക്കല്ലിട്ട, തലശ്ശേരിക്കാരിയായ ഹെഡ്‌മിസ്ട്രസ്സിനെ ഓർത്തുകൊണ്ട് എന്റെ കൃഷിപാഠം ആരംഭിക്കുകയാണ്. അന്യസംസ്ഥാനത്ത് ജോലിയുള്ള, അവിടെ കുടുംബസമേതം താമസിക്കുന്ന ടീച്ചറുടെ മകൻ, അവധിക്ക് വീട്ടിൽ‌വന്ന് തിരിച്ചുപോകുമ്പോൾ സ്വന്തം വാഹനത്തിൽ ചാക്ക് നിറയെ വിലപിടിച്ച ഒരു വസ്തു കൂടി ‌കൊണ്ടുപോകും,,,

…. ‘മണ്ണ്’….

‘കുട്ടിക്കാലത്ത് അവൻ ഓടിക്കളിച്ച, വീട്ടുപറമ്പിലെ വളക്കൂറുള്ള മണ്ണ്’.

അവരുടെ ഫ്ലാറ്റിന്റെ വരാന്തയിൽ സൂര്യപ്രകാശമുള്ള സ്ഥലത്ത് ചെടിച്ചട്ടിയിൽ മണ്ണ് നിറച്ച് ചെടി വളർത്താൻ…

,,,

കുട്ടിക്കാലം മുതൽ കൃഷി കണ്ടും ചെയ്തും ജീവിച്ച, പ്രായമായപ്പോൾ കൃഷിയെ കൂടുതൽ അറിഞ്ഞിരുന്ന, എനിക്ക് അതൊരു പുതിയ അറിവ് ആയിരുന്നു,

                 കൃഷി ചെയ്യാൻ വിശാലമായ തോട്ടവും വയലും പറമ്പും വേണമെന്നില്ല; ഇത്തിരി മണ്ണും വെള്ളവും ഒത്തിരി സൂര്യപ്രകാശവും ലഭിക്കുന്ന എവിടെയും കൃഷി ചെയ്യാം. അത് പുരപ്പുറമായാൽ ഏറെ മെച്ചം. അങ്ങനെ വർഷങ്ങളായി എന്റെ ടെറസ്സിൽ എന്റെ കൃഷിപാഠം അരങ്ങേറുകയാണ്; എന്റെ അനുഭവത്തിൽ നിന്ന് ഞാൻ പഠിച്ച കൃഷിപാഠം.

ഒരുക്കങ്ങൾ:

ടെറസ്സിൽ‌ വീട്ടാവശ്യത്തിനുള്ള പച്ചക്കറികൾ

                      ടെറസ്സിലെ കൃഷിക്ക് അനുയോജ്യമായ ഒരു ടെറസ്സ് (മേൽക്കൂര) വേണം. അത് തീരെ ചെരിവില്ലാതെ പരന്നതോ, അല്പം ചെരിവുള്ളതോ ആവാം. നല്ല ചെരിവുള്ളതായാൽ കൃഷിയോടൊപ്പം കൃഷിക്കാരനും താഴെപോവാൻ ഇടയുണ്ട്. പിന്നെ ടെറസ്സിന്റെ വശങ്ങളിൽ ഉയർത്തിക്കെട്ടിയ ഇഷ്ടികമതിലിന് അരമീറ്റർ ഉയരമെങ്കിലും ഉണ്ടാവണം; സ്വന്തം സുരക്ഷിതത്വം നോക്കാൻ,,, കൃഷിക്ക് ആവശ്യമായ മണ്ണ്, വെള്ളം, വിത്ത്, വളം, വള്ളികൾ പടരാനുള്ള കമ്പുകൾ, ആദിയായവ മേൽക്കൂരയിൽ എത്തിക്കാനായി ഉറപ്പുള്ള കോണി ആവശ്യമാണ്. ജലസേചനസൌകര്യത്തിന് വെള്ളം പൈപ്പ്‌വഴി ലഭിക്കണമെങ്കിൽ വീട്ടിലെ വാട്ടർ‌ടാങ്ക് ടെറസ്സിനെക്കാൾ ഉയർന്നിരിക്കാൻ പ്രത്യേകം ശ്രദ്ധിക്കണം. ടെറസ്സിനു സമീപം മരങ്ങൾ ഉണ്ടെങ്കിൽ നമുക്ക് ടെറസ്സിൽ കയറിനടക്കാൻ ധൈര്യം കൂടുമെങ്കിലും ആ മരക്കമ്പുകളിലൂടെ നടന്നുവരുന്ന എലികളും മറ്റു ക്ഷുദ്രജീവികളും കൃഷിയുടെ പങ്ക്പറ്റുന്നതിനാൽ അവ ഒഴിവാക്കുന്നതാണ് നല്ലത്.

കാലം, സമയം:

                        ‘ടെറസ്സ് കൃഷി’ മഴക്കാലത്തിന് യോജിച്ചതല്ല, വെള്ളം നിറഞ്ഞ് വഴുതുന്ന സിമന്റ് മേൽക്കൂരയിൽ ഒരു പരീക്ഷണം നടത്തേണ്ടതില്ല. പിന്നെ ശക്തമായ മഴയിൽ മണ്ണിന്റെ ഫലപുഷ്ടി നഷ്ടപ്പെട്ടിരിക്കും. മഴക്കാലം കഴിഞ്ഞ് ടെറസ്സ് ഉണങ്ങിയ നേരത്ത് കൃഷി തുടങ്ങാം. ഓണം കഴിഞ്ഞ് കൃഷി തുടങ്ങിയാൽ ഇടക്കിടെ പെയ്യുന്ന മഴയും തുലാമഴയും കൃഷിക്ക് നല്ലതാണ്. മേയ് അവസാനം കാലവർഷം ആരംഭിക്കുന്നതിന് അല്പദിവസം മുൻപ് കൃഷി അവസാനിപ്പിച്ച് ടെറസ്സ് ക്ലിയർ ആക്കണം. ഉപയോഗിച്ച മണ്ണ് ഒരിടത്ത് കൂട്ടിയിട്ട് പോളിത്തീൻ ഷീറ്റ് കൊണ്ട് മഴനനയാതെ മൂടിയാൽ അടുത്ത കൃഷിക്ക് അതേമണ്ണ് ഉണക്കിയിട്ട് ഉപയോഗിക്കാം. എല്ലാദിവസവും രാവിലെയും വൈകുന്നേരവും കൃഷിസ്ഥലത്ത് കയറിവന്ന് വെള്ളം നനക്കുകയും പരിചരിക്കുകയും വേണം. ജലസേചനം നടത്തുന്നത് മണ്ണ് പൂർണ്ണമായി നനയാൻ മാത്രം; വെള്ളം കവിഞ്ഞൊഴുകേണ്ടതില്ല.

ശ്രദ്ധിക്കേണ്ട കാര്യങ്ങൾ:

ഇത് ഞാൻ തന്നെയാണ്, 
രാത്രിസമയത്തും വിളവെടുക്കാം

                         കൃഷി ചെയ്യുന്നത് ടെറസ്സിലാണെന്ന് ഓർമ്മവേണം. ഉയരത്തിൽ കയറി നടക്കാൻ അമിതമായ പേടിയുള്ളവരും തീരെ പേടിയില്ലാത്തവരും ടെറസ്സിൽ കയറുന്നത് പരമാവധി ഒഴിവാക്കണം. ടെറസ്സ്‌കൃഷി സ്വന്തമായി ചെയ്യേണ്ടതാണ്; അത്യാവശ്യം സഹായം എത്തിക്കാനല്ലാതെ, മറ്റൊരാളെവെച്ച് ചെയ്യിക്കേണ്ടതല്ല. കുട്ടികളെയോ ടെറസ്സിൽ കയറാൻ പ്രയാസമുള്ളവരെയോ കൃഷി കാണിക്കാനായി  ഒരിക്കലും പിടിച്ച് കയറ്റരുത്. ചെടിക്ക് വെള്ളം ഒഴിച്ചുകൊണ്ടിരിക്കുമ്പോൾ വീട്ടിനകത്തുള്ളവരെയോ, വഴിയേ പോകുന്ന അയൽ‌വാസിയെയോ വിളിച്ച്‌കൂവി സംസാരിക്കുന്നത് നമ്മുടെ ശ്രദ്ധ പതറാൻ ഇടയാക്കും. ഏല്ലദിവസവും ടെറസ്സിൽ കയറാൻ നേരത്ത് ബ്ലെയ്ഡ്, കത്രിക, കടലാസ്, പോളിത്തീൻ ബാഗ് തുടങ്ങിയ അവശ്യവസ്തുക്കൾ ഒരു ചെറിയ ബാഗിലാക്കി എടുക്കുമ്പോൾ കൂടെ സ്വന്തം മൊബൈലും കരുതുന്നത് അത്യാവശ്യം വരുമ്പോൾ ആശയവിനിമയം നടത്താൻ കഴിയും. പിന്നെ കൃഷിക്കാരന് മണ്ണിൽ കൃഷിചെയ്ത പരിചയം ഇത്തിരിയെങ്കിലും വേണം; അതായത് ജീവിതത്തിൽ ആദ്യമായി പച്ചക്കറി നടുന്നത് ടെറസ്സിൽ ആയി മാറരുത്.

നിലമൊരുക്കൽ:

പയർ‌കൃഷി ചെയ്യാൻ തുടങ്ങിയ തടം

                        കോൺക്രീറ്റ് മട്ടുപ്പാവിൽ മണ്ണ് നിരത്തി വളം ചേർത്ത് വെള്ളമൊഴിച്ച് കൃഷി ചെയ്യുമ്പോൾ വൃത്തി കുറയും. മേൽക്കൂരയിൽ വളരുന്ന ചെടിയുടെ വേരുകൾ സിമന്റിന് ബലക്ഷയം ഉണ്ടാക്കി കെട്ടിടത്തിന് ചോർച്ചവരുത്തും എന്ന് പറയുന്നുണ്ട്. അതുകൊണ്ട് ടെറസ്സിൽ നേരിട്ട് മണ്ണ് നിരത്തി കൃഷി ചെയ്യുന്നത് നല്ലതല്ല. നാലുവശത്തും ഇഷ്ടിക ചരിച്ച്‌വെച്ച് അടിയിൽ പ്ലാസ്റ്റിക്ക് ഷീറ്റ് ഒന്നോ രണ്ടോ അട്ടിയിൽ വിടവില്ലാതെ വിരിച്ച് അതിനു മുകളിൽ ഇഷ്ടിക‌ ഉയരത്തിൽ‌മാത്രം മണ്ണിട്ട് കൃഷി ചെയ്യാം. തൊടിയിലെ മണ്ണിന്റെ കൂടെ ചാണകം ഉണക്കിപ്പൊടിച്ചത്, ചകരിച്ചോറ്, അറക്കപ്പൊടി, ആറ്റുമണൽ, മണ്ണിരക്കമ്പോസ്റ്റ്, കരിയിലകൾ എന്നിവയും ചേർത്ത് കൃഷി ചെയ്യാനുള്ള അടിത്തട്ട് തയ്യാരാക്കാം. ടെറസ്സിന്റെ വശങ്ങളിലായാൽ മൂന്ന് വശങ്ങളിൽ ഇഷ്ടിക അതിരിട്ട്, പോളിത്തീൻ ഷീറ്റ് വിരിച്ച് കൃഷി ചെയ്യാം. എങ്ങനെ കൃഷിചെയ്താലും ടെറസ്സും മണ്ണും നേരിട്ട് സമ്പർക്കം വരുന്നത് പരമാവധി ഒഴിവാക്കുന്നത് നല്ലതാണ്.

പോളിത്തീൻ ചാക്കിലും തറയിൽ
ഷീറ്റ് വിരിച്ചും കൃഷിചെയ്യാം

                       പോളിത്തീൻ കവറിലും ചാക്കിലും മണ്ണ് നിറച്ച് കൃഷി ചെയ്യാം. ചാക്ക് പുറത്തോട്ട് മടക്കി ഏതാണ്ട് ഒരടി കനത്തിൽ മണ്ണ് നിറച്ചാൽ മതിയാവും. വെള്ളം പുറത്തേക്ക് ഒഴുകാനായി ഏതാനും സുഷിരങ്ങൾ ആവശ്യമാണ്. സുതാര്യമായ പോളിത്തീൻ കവറിൽ കൃഷി ചെയ്യരുത്; വേരിന് സൂര്യപ്രകാശം തട്ടുന്നത് ചെടിയുടെ വളർച്ചയെ തകരാറിലാക്കും. ചെടിനട്ടതിനു ശേഷം വളർച്ചക്കനുസരിച്ച് വളവും മണ്ണും പിന്നീട് ചേർക്കേണ്ടി വരുന്നതിനാൽ ആദ്യമേ കൂടുതൽ മണ്ണ് നിറക്കേണ്ടതില്ല. ടെറസ്സിൽ ഇഷ്ടം‌പോലെ സൂര്യപ്രകാശം ലഭിക്കുന്നതിനാൽ വളർച്ചക്കനുസരിച്ച് ചെടികൾ തമ്മിലുള്ള അകലം ക്രമീകരിക്കാം.

പന്തൽ, താങ്ങ് നിർമ്മാണം:

പന്തൽ നിർമ്മാണം തൂൺ ഉറപ്പിക്കൽ

കയ്പയും പയറും പന്തലിൽ കയറുന്നു

                      ഹ്രസ്വകാല പച്ചക്കറി വിളകളിൽ പലതും പടർന്നു വളരുന്നവയാണ്; ചിലത് കമ്പുകളിലും ചിലത് പന്തലുകളിലും വളർന്നാൽ നന്നായി വിളവ് തരും. കൃഷി ടെറസ്സിലാവുമ്പോൾ അതിന് താങ്ങായി വരുന്ന മരക്കമ്പുകളും കയറുകളും താഴെനിന്ന് ആയാൽ പല പ്രശ്നങ്ങളും ഉണ്ട്. ആ കമ്പിലൂടെ മുകളിലെത്തുന്ന ഉറുമ്പുകളും മറ്റു ക്ഷുദ്രജീവികളും കൃഷിസ്ഥലത്ത് സ്ഥിരതാമസമാക്കി നമ്മുടെ ഉറക്കം കെടുത്തും. കയ്പ(പാവൽ), പടവലം, തുടങ്ങിയവക്ക് വളരാനുള്ള പന്തൽ നമുക്ക് ടെറസ്സിൽ‌തന്നെ നിർമ്മിക്കാം. അതോടനുബന്ധിച്ച് പയറുവർഗങ്ങൾ പടരാനാവശ്യമായ താങ്ങുകളും ഉണ്ടാക്കാം. ഉപയോഗം കഴിഞ്ഞ 4 ടിന്നുകളും ചെറിയ കല്ലുകളും(കരിങ്കൽ ചീളുകളും ആവാം) സംഘടിപ്പിച്ചാൽ പന്തലിന്റെ തൂണുകൾ കുത്തനെ നിർത്താൻ കഴിയും. ഉറപ്പുള്ള കമ്പ് ടീന്നിന്റെ മധ്യഭാഗത്ത് കുത്തനെ നിർത്തിയശേഷം കല്ലുകൾ നാല്‌വശത്തും കടത്തി ഉറപ്പിച്ചാൽ നല്ല ബലമുള്ള താങ്ങുകൾ ലഭിക്കും. ഇങ്ങനെയുള്ള തൂണുകൾ ചേർത്ത് കെട്ടി കയ്പ പടവലം എന്നിവയുടെ പന്തലാക്കാം. ഉറപ്പുള്ളതാണെങ്കിലും ഭാരം കുറഞ്ഞ ഉണങ്ങിയ കമ്പുകൾ പന്തൽ നിർമ്മാണത്തിന് ഉപയോഗിക്കണം.

വളങ്ങൾ:

                  രാസവളങ്ങൾ തീരെ ഉപയോഗിക്കരുത്, ഒപ്പം വിറക് കത്തിച്ച ചാരവും പരമാവധി ഒഴിവാക്കുക. (ടെറസ്സിന് കേട് പറ്റിയാൽ കാരണം പറയുന്നത് കൃഷിയെ ആയിരിക്കും എന്ന് ഓർക്കണം) പച്ചിലവളം, മണ്ണിരക്കമ്പോസ്റ്റ്, കാലിവളം, പിണ്ണാക്ക്, തുടങ്ങിയ ജൈവവളങ്ങൾ ഉണങ്ങിപൊടിഞ്ഞത് ഉപയോഗിക്കാം. നിലക്കടലപ്പിണ്ണാക്ക് പൊടിച്ചത് ചെടികളുടെ ഓരോ വളർച്ചാഘട്ടത്തിലും ഉപയോഗിക്കാം.

കീടനിയന്ത്രണം:

                  കീടങ്ങൾക്ക് ടെറസ്സ് പരിചയമില്ലാത്തതാണെങ്കിലും കൃഷിയെ പരിചയമുള്ള എല്ലാ കീടങ്ങളുടെയും ആക്രമണം  ഇവിടെ പ്രതീക്ഷിക്കാം. പച്ചക്കറി കൃഷിയിൽ ജൈവികമായ കീടനിയന്ത്രണമാർഗ്ഗങ്ങൾ ഏതും സ്വീകരിക്കാം. നമുക്ക് നോക്കാൻ പറ്റുന്ന പരിധിയിലുള്ള ചെടികളായതിനാൽ എല്ലാദിവസവും ശ്രദ്ധിച്ച്‌നോക്കി കീടങ്ങളെ പിടിച്ച് നശിപ്പിക്കുന്നതാണ് ഏറ്റവും നല്ലത്. പാവൽ, പടവലം, വെള്ളരി, കക്കിരി തുടങ്ങിയവയിൽ കായീച്ചയുടെ ആക്രമണം ഒഴിവാക്കാൻ  അവ കായ്ച്ചതിന്റെ പിറ്റേദിവസം‌തന്നെ കായകൾ കടലാസുകൊണ്ട് പൊതിയുന്നതാണ് നല്ലത്. വിളകൾ മൂപ്പെത്തുന്ന മുറക്ക് വിളെവെടുത്ത് കറിവെച്ച് കഴിക്കണം.

വളരുകയായി ടെറസ്സിൽ, പയർ

കൃഷി ചെയ്യുന്ന സസ്യങ്ങൾ:

                  വീട്ടാവശ്യത്തിനുള്ള തക്കാളി, വെണ്ട, വഴുതന, വെള്ളരി,  പാവൽ, പടവലം, മത്തൻ, പയർ, ചീര, മുള്ളങ്കി, മുളക് ആദിയായവ എളുപ്പത്തിൽ കൃഷി ചെയ്യാം. ഇവകൂടാതെ പരീക്ഷണ അടിസ്ഥാനത്തിൽ എല്ലായിനം ഹ്രസ്വകാല വിളകളും കിഴങ്ങുകളും ടെറസ്സിൽ കൃഷിചെയ്യാം. 
**********

ഓരോ വിളവുകളുടെയും കൃഷിരീതികൾ അടുത്ത അദ്ധ്യായത്തിൽ വായിക്കാം.

ടെറസ്സിൽ ഒരു കൃഷിപാഠം; അദ്ധ്യായം2

ടെറസ്സിൽ ഒരു കൃഷിപാഠം; അദ്ധ്യായം3

ടെറസ്സിൽ ഒരു കൃഷിപാഠം; അദ്ധ്യായം4 

ടെറസ്സിൽ ഒരു കൃഷിപാഠം; അദ്ധ്യായം5