ടെറസ്സിൽ ഒരു കൃഷിപാഠം; അദ്ധ്യായം 4

                             ഇടവേളക്ക് ശേഷം കൃഷിപാഠം നാലാം അദ്ധ്യായം ആരംഭിക്കുകയാണ്. മുൻ അദ്ധ്യായങ്ങൾ എഴുതിയതിനുശേഷം ഒരു തവണ ടെറസ്‌കൃഷിയും വിളവെടുപ്പും കഴിഞ്ഞു. പതിവിൽ കൂടുതൽ കാലം മഴ പെയ്തതിനാൽ എന്റെ ടെറസ്സിൽ എന്താണ് സംഭവിച്ചത് എന്ന് ഞാൻ ശ്രദ്ധിച്ചതേയില്ല. കാലവർഷം കഴിഞ്ഞതോടെ ഇനി കൃഷി ആരംഭിക്കാം. 
                നിത്യജീവിതത്തിൽ നമ്മൾ ഉപയോഗിക്കുന്ന ചിലയിനം വിളകളുടെ കൃഷിരീതിയാണ് ഇവിടെ പരിചയപ്പെടുത്തുന്നത്. ടെറസ്സിൽ ഒരു കൃഷിപാഠം പുതിയ അദ്ധ്യായം ആരംഭിക്കുന്നു.

 ഒരു ദിവസം,,,

അയൽ‌പക്കത്തുള്ള ഒരു വീട്ടിൽ, അടുക്കളപ്പുറത്തുകൂടി എളുപ്പവഴി സഞ്ചരിക്കുമ്പോൾ കിണറ്റിനരികിൽ നിറയെ കായ്ച്ച രണ്ട് വഴുതന ചെടികൾ കണ്ടു. അതിൽ ഒരു കായപോലും പറിച്ചെടുക്കാത്തതിനാൽ ചിലത് മൂത്ത്, വിത്ത് ആയി മാറിയിരിക്കുന്നു. ഇതുകണ്ട് ആശ്ചര്യപ്പെട്ട ഞാൻ ചെറുപ്പക്കാരിയായ വീട്ടമ്മയോട് സംശയം ചോദിച്ചപ്പോൾ അവരുടെ മറുപടി എന്നെ ഞെട്ടിച്ചു,

“അത് ടീച്ചറെ പറമ്പിൽ വീണ്‌മുളച്ച ചെടിയുടെ കായ കറിവെക്കാൻ പറ്റുമോ?”

“അതെന്താ സ്വന്തം പറമ്പിൽ കായ്ച്ചത് കറിവെച്ചു കൂടെ?”

“നമ്മള് പച്ചക്കറികളൊക്കെ ടൌണിന്നു വാങ്ങാറാണ് പതിവ്; ഇതിപ്പൊ നല്ല വഴുതനങ്ങയാണെന്ന് എങ്ങനെ തിരിച്ചറിയും?”

                        ഏതാണ്ട് ഇരുപത് വർഷം മുൻപ്‌വരെ, ഇതെ ഗ്രാമത്തിലെ എല്ലാവീട്ടുകാരും തൊട്ടടുത്ത വയലിൽ പച്ചക്കറി വിളകൾ കൃഷി ചെയ്യാറുണ്ടായിരുന്നു. രണ്ടാവിള നെല്ല് കൊയ്തതിനുശേഷം സ്ഥലം‌ഉടമ നാട്ടുകാർക്ക് പച്ചക്കറി കൃഷി ചെയ്യാൻ സ്വന്തം വയൽ വിട്ടുകൊടുക്കുന്ന പതിവ് പണ്ട്‌തൊട്ടേ ഉണ്ടായിരുന്നു. അവിടെ കുടുംബാംഗങ്ങളെല്ലാം ഒത്തുചേർന്ന് വെള്ളരി, വെണ്ട, കയ്പ, ചീര തുടങ്ങിയവ നട്ട്, കാലവർഷം ആരംഭിക്കുന്നതുവരെ വിളവെടുക്കുന്നു. അങ്ങനെയുള്ള നന്മ നിറഞ്ഞ നാട്ടിൻ‌പുറം പുത്തൻ തലമുറക്ക് അന്യമായിരിക്കയാണ്.

                      പട്ടണമായി വികസിച്ചുകൊണ്ടിരിക്കുന്ന ഒരു ഗ്രാമത്തിലാണ് ഞാനിപ്പോൾ താമസിക്കുന്നത്. ഗ്രാമീണ നിഷ്ക്കളങ്കതയും പരിശുദ്ധിയും പരസ്പരബന്ധവും കാർഷിക സംസ്കൃതിയും പാരമ്പര്യവും പാടെ മറന്ന നാട്ടുകാർ. എന്നാൽ പട്ടണത്തിന്റെതായ വിദ്യാഭ്യാസ യോഗ്യതയും ഉദ്യോഗവും പൊങ്ങച്ചവും ജീവിതപുരോഗതിയും ഇവിടെ കടന്നു വന്നിട്ടില്ല. പണം യഥേഷ്ടം ഉള്ളതിനാൽ സ്വന്തം തൊടിയിലെ മണ്ണിനെ മറന്നുകൊണ്ട് തൊട്ടടുത്ത കടയിൽ‌പോയി സാധനങ്ങൾ വാങ്ങുന്ന ഉപഭോഗസംസ്ക്കാരം വളർന്ന് വന്നിരിക്കയാണ്.

ഇന്ന് തക്കാളി കൃഷിയെക്കുറിച്ച്,,,

                തക്കാളി, വഴുതന, മുളക് എന്നിവ ഒരേ കുടുംബത്തിൽ ഉൾപ്പെട്ടവരാണ് (Solanaceae). ഇവയിൽ വഴുതനയും മുളകും കേരളീയർ കൃഷി ചെയ്യാറുണ്ടെങ്കിലും തക്കാളി ധാരാളമായി കൃഷി ചെയ്ത് കാണുന്നില്ല. അന്യ സംസ്ഥാനത്തുനിന്നും പെട്ടിക്കണക്കിന് തക്കാളികൾ കടന്നുവരുന്നതു കൊണ്ടായിരിക്കാം കേരളത്തിലെ മണ്ണിൽ തക്കാളി ഒരു പ്രധാന പച്ചക്കറിയായി നട്ടുവളർത്താത്തത്, എന്ന് തോന്നുന്നു.  

                    തക്കാളിയുടെ ജന്മദേശം തെക്കെ അമേരിക്കയാണ്. പോർച്ചുഗീസുകാരാണ് തക്കാളി നമ്മുടെ നാട്ടിൽ പ്രചരിപ്പിച്ചത്. സൂര്യപ്രകാശം ലഭിക്കുന്ന വെള്ളം കെട്ടിക്കിടക്കാത്ത സ്ഥലങ്ങളിൽ തക്കാളിചെടി നന്നായി വളരും. എന്നാൽ വീട്ടുപറമ്പിൽ വളരുന്നതിനെക്കാൾ നന്നായിട്ട് ചെടിച്ചട്ടിയിലും ചാക്കിലും വളരും. അത് ടെറസ്സിലായാൽ കൂടുതൽ നന്നായി വളർന്ന് കായ്ക്കും. തക്കാളി കൃഷി ചെയ്യുമ്പോൾ ഒരു പ്രധാന കാര്യം ശ്രദ്ധിക്കണം. കേരളത്തിലെ കാലാവസ്ഥയിൽ മഴക്കാലം കഴിഞ്ഞ് സപ്തംബർ മുതൽ ഡിസം‌ബർ വരെയുള്ള മാസത്തിനുള്ളിൽ വിത്ത് മുളപ്പിച്ച  ചെടികൾ നടണം. ജനവരി മുതലങ്ങോട്ട് വേനൽക്കാലത്ത് നട്ട തക്കാളിച്ചെടികൾ നന്നായി വളർന്നാലും, കായ വലുതായി പൂർണ്ണ വളർച്ചയെത്താറില്ല എന്നാണ് എന്റെ അനുഭവം.

വിത്ത് വിതക്കൽ: തക്കാളി നടാൻ വിത്തുകൾക്കായി പ്രത്യേകം അന്വേഷിക്കേണ്ടതില്ല. കടകളിൽ നിന്ന് ലഭിക്കുന്ന നല്ല ആരോഗ്യമുള്ള തക്കാളി കറിവെക്കാൻ ഉപയോഗിക്കുമ്പോൾ അതിന്റെ ഉൾവശത്തെ വിത്തുകൾ ശേഖരിച്ച്, വെള്ളത്തിൽ കഴുകിയെടുത്ത് നേരിട്ട് മണ്ണിൽ വിതച്ചാൽ മതി. ടെറസ്സിലെ ചെടിച്ചട്ടിയിലെ മണ്ണിൽ വിതച്ച വിത്തിന് വെള്ളമൊഴിച്ച് കൊടുക്കണം. വിത്ത് മുളച്ച് മൂന്നോ നാലോ ഇലകൾ വന്ന്, തണ്ടിന് ഉറപ്പ് വന്നുകഴിഞ്ഞാൽ (പത്ത് സെന്റീമീറ്റർ ഉയരം വന്നാൽ) പറിച്ചു നടാൻ പാകമാവും.

                          ടെറസ്സിൽ കൃഷി ചെയ്യുമ്പോൾ ചാണകപ്പൊടിയും മണ്ണിരക്കമ്പോസ്റ്റും കലർത്തിയ മണ്ണ് തറയിൽ വിരിച്ച പ്ലാസ്റ്റിക്ക് ഷീറ്റിലും ചാക്കിലും ചെടിച്ചട്ടിയിലും നിറച്ച് നന്നായി നനച്ചതിനുശേഷം തക്കാളിചെടി പറിച്ചുനടാം. ഒരു ചെടിച്ചട്ടിയിൽ ഒന്ന് വീതവും വലിയ ചാക്കിൽ രണ്ടെണ്ണം വീതവും വേര് പൊട്ടാതെ ചുവടെയുള്ള മണ്ണോട്‌കൂടി നടണം. ചാക്കിൽ നടുമ്പോൾ വെണ്ട ചീര എന്നിവയുടെ കൂടെ തക്കാളി നടുന്നതും നന്നായിരിക്കും.

 പരിചരണം: ദിവസേന രാവിലെയും വൈകിട്ടും വെള്ളമൊഴിക്കാൻ മറക്കരുത്. തക്കാളിചെടിയുടെ ശാഖകൾക്ക് ബലം കുറവാണ്. അതുകൊണ്ട് ഒടിഞ്ഞു പോകാതിരിക്കാൻ കമ്പുകൾ‌കൊണ്ട് ഒരു താങ്ങ് ഉറപ്പിച്ചുകൊടുക്കണം.

കീടനിയന്ത്രണം: കീടങ്ങളായി വരുന്നത് പലപ്പോഴും ശലഭങ്ങളുടെ ലാർവ്വകൾ ആയിരിക്കും. ഇലകൾ തിന്നു തീർക്കുന്ന അവയെ കണ്ടുപിടിച്ച് കൊന്ന് നശിപ്പിക്കണം. പിന്നെ ചിത്രകീടങ്ങൾ ഇലയിൽ ഡിസൈൻ വരച്ചതായി കാണാം. രാസകീടനാശിനികൾ തക്കാളിചെടിയിൽ തളിച്ച് പരീക്ഷണങ്ങൾ നടത്താതിരിക്കുന്നതാണ് നല്ലത്.

രോഗനിയന്ത്രണം: നന്നായി വളർന്ന് പുഷ്പിച്ചുകൊണ്ടിരിക്കുന്ന തക്കാളിചെടിയെ പെട്ടെന്നൊരു ദിവസം നശിപ്പിക്കുന്നതാണ് ‘വാട്ടം’.  കൂട്ടത്തിൽ നല്ല ചെടി പെട്ടെന്നൊരുദിവസം ഇലകൾ വാടി ഉണങ്ങുന്ന ദയനീയ ദൃശ്യമാണിത്. ഈ രോഗം വന്ന ചെടിക്ക് നന്നായി വെള്ളമൊഴിച്ച് കൊടുത്താലും രക്ഷപ്പെടുത്തുക പ്രയാസമാണ്. ടെറസ്സിലെ തറയിൽ വളരുന്ന ചെടിയിൽ വാട്ടം ഉണ്ടാവാറുണ്ടെങ്കിലും ചെടിച്ചട്ടിയിലും ചാക്കിലും വളർത്തുന്ന ചെടികൾക്ക് ഈ രോഗം വരുന്നത് അപൂർവ്വമാണ്. കായ്ച്ചു തുടങ്ങിയ തക്കാളിചെടിക്ക് രോഗബാധകളൊന്നും ഉണ്ടാവാറില്ല.

വളം ചേർക്കൽ: രാസവളപ്രയോഗം ആവശ്യമില്ലാത്തെ ചെടിയാണ് തക്കാളി. പുഷ്പ്പിക്കുന്നതിനിടയിൽ ഒന്നോ രണ്ടോ തവണ നിലക്കടല പുണ്ണാക്ക്, മണ്ണിരക്കമ്പോസ്റ്റ്, കാലിവളം എന്നിവ പൊടിച്ച് ചെടിയുടെ ചുവട്ടിൽ ഇട്ടതിനുശേഷം മുകളിൽ മണ്ണിട്ട് മൂടണം. ആവ്ശ്യത്തിന് ജലസേചനം കൂടി നടത്തിയാൽ ചെടി നന്നായി വളർന്ന് പുഷ്പിക്കും.

പൂവിടൽ: ചെടി നട്ട് ഒരു മാസത്തിനുള്ളിൽ പൂവിട്ടുതുടങ്ങും; മഞ്ഞ നിറമുള്ള അഞ്ച് ദളങ്ങളോടു കൂടിയ കൊച്ചു പൂക്കൾ. ചെറിയ ഷഡ്‌പദങ്ങളാണ് പരാഗണം നടത്തുന്നത്. കായ്കൾ ‌മഞ്ഞ കലർന്ന വെള്ളനിറത്തിൽ പ്രത്യക്ഷപ്പെടുന്നു. ഉരുണ്ട് ഭംഗിയേറിയ കായകൾ പതുക്കെ വലുതായി പതുക്കെ മഞ്ഞനിറമായി ചുവപ്പിലേക്ക് കടക്കുന്നു. നല്ല ചുവപ്പ് നിറമായി പഴുത്ത് പാകമായ തക്കാളികൾ ടെറസ്സിൽ നിന്നും  പറിച്ചെടുക്കാം.

                        തക്കാളി പക്ഷികൾക്ക് ഇഷ്ടമുള്ള പഴമാണെങ്കിലും ടെറസ്സിൽ വളരുന്ന ചെടിയിൽ നിന്ന് അവ കൊത്തിതിന്നാൻ കാക്കയോ അതുപോലുള്ള മറ്റു പക്ഷികളൊ ശ്രമിച്ചതായി എനിക്ക് കാണാൻ കഴിഞ്ഞിട്ടില്ല. ടെറസ്സ് കൃഷി പക്ഷികൾക്ക് അപരിചിതമായതു കൊണ്ടാവാം. എന്നാൽ എലികൾക്ക് ടെറസ്സിൽ കയറാനുള്ള സൌകര്യം ഉണ്ടെങ്കിൽ അവ പാകമായ തക്കാളി, പയറ്, മുളക്, തുടങ്ങിയവ ദിവസേനയെന്നോണം തിന്നുനശിപ്പിക്കും. അങ്ങനെ ഉണ്ടായാൽ ടെറസ്സ് കൃഷി ചെയ്യുന്നവർ ഒരു എലിക്കെണിയുടെ സഹായം തേടുന്നതാണ് നല്ലത്.

                         തക്കാളിചെടിയിൽ കായ പാകമായാൽ അവയെല്ലാം ഒന്നിച്ച് പഴുക്കാൻ ആരംഭിക്കും. വിവിധ ആകൃതിയും വലിപ്പവും ഉള്ള താക്കാളികൾ ലഭിക്കുന്ന ചെടികൾ നട്ട്‌വളർത്താറുണ്ട്. ധാരാളം തക്കാളി ഒന്നിച്ച് വിളവെടുത്താൽ അവ നന്നായി പഴുത്ത് കേടാവാതിരിക്കാൻ ഒരു പരിധിവരെ റഫ്രിജറേറ്ററിൽ സൂക്ഷിക്കാം. അതുപോലെ ജ്യൂസ്, ജാം, സോസ്, തുടങ്ങിയവ പഴുത്ത താക്കാളിയിൽ നിന്നും നിർമ്മിച്ച് ഏതാനും ദിവസങ്ങൾ കേട് വരാതെ സൂക്ഷിക്കാം.

വഴുതന:

മലയാളിയുടെ അടുക്കളയിൽ ഇഷ്ടപച്ചക്കറി ആയ വഴുതനങ്ങക്ക് പോഷകാംശങ്ങൾ മറ്റ് പച്ചക്കറികളെക്കാൾ കുറവാണെന്ന് പറയപ്പെടുന്നു. പല നിറത്തിലും വലിപ്പത്തിലും ആകൃതിയിലും ഉള്ള വഴുതനങ്ങകൾ നമുക്കറിയാം. ടെറസ്സിൽ തക്കാളി കൃഷി ചെയ്യുന്ന അതേ രീതിയിൽ വഴുതനയും കൃഷി ചെയ്യാം.

                   കത്തിരിക്ക എന്നും പറയുന്ന വഴുതനകൃഷിക്ക് നന്നായി ഉണങ്ങി മൂപ്പെത്തിയ കായയുടെ വിത്ത് ഉണക്കി സൂക്ഷിച്ചത് നടാൻ ഉപയോഗിക്കണം. ടെറസ്സിലെ ചെടിചട്ടിയിലോ തറയിൽ വിരിച്ച മണലിലോ വിത്ത് വിതച്ച് രാവിലെയും വൈകിട്ടും നനച്ചാൽ മതി. ധാരാളം വഴുതന വിത്ത് വിതച്ചാലും അവയെല്ലാം‌തന്നെ മുളച്ച് വരാറില്ല എന്ന അനുഭവം ഉണ്ട്.

                വിത്ത് മുളച്ച് വളരുന്ന കുഞ്ഞ് വഴുതനചെടിക്ക് നാലോ അഞ്ചോ ഇലകൾ വന്ന് ഏതാണ്ട് പത്ത് സെന്റീമീറ്റർ ഉയരം വന്നാൽ ഇളക്കിമാറ്റി നടാം. മണ്ണും കമ്പോസ്റ്റും ചാണകപ്പൊടിയും കലർത്തിയ മിശൃതം ചാക്കിലും ചെടിച്ചട്ടിയിലും നിറച്ച് അവ ഓരോന്നിലും ഒരു ചെടി നടുന്നതാണ് ഉത്തമം. ചെടി വളരുന്നതനുസരിച്ച് ജൈവവളം ചേർത്ത് കൊടുക്കണം.

        വെള്ളയും വയലറ്റും നിറങ്ങൾ കളർന്ന പൂക്കളാണ് വഴുതന ചെടിയിൽ വിടരുന്നത്. പലതരം നിറത്തിലും ആകൃതിയിലും വലിപ്പത്തിലും ഉള്ള വഴുതനങ്ങകൾ ലഭ്യമാണ്. വഴുതന ഏകവർഷ സസ്യമായി കൃഷി ചെയ്യാറുണ്ടെങ്കിലും ഈ സസ്യം രണ്ടോ മൂന്നോ കൊല്ലം വളർന്ന് കായ്ഫലം തരും. വെള്ളവും വളവും നൽകിയിട്ട്, മൂപ്പെത്തിയ ശാഖകൾ മുറിച്ചുമാറ്റിയാൽ വഴുതനചെടി തുടർന്ന് വളരും. ടെറസ്സിൽ വളർന്ന് വിളവെടുപ്പ് കഴിഞ്ഞ വഴുതനസസ്യം മഴക്കാലം വരാറായാൽ വേരോടെ പിഴുതുമാറ്റി മുപ്പെത്തിയ വേരും ശാഖകളും മുറിച്ചുമാറ്റിയിട്ട്, തൊടിയിലെ മണ്ണിൽ നട്ടാൽ വീണ്ടും വളർന്ന് കായ്ക്കാറുണ്ട്. മുളക് ചെടിയും ഇതുപോലെ പിഴുതുമാറ്റി നട്ടാൽ വിളവെടുക്കാൻ കഴിയും.

മുളക്:

                 മുളകിന് വറ്റൽമുളക്, പറങ്കിമുളക് എന്നൊക്കെ പറയാറുണ്ട്. മലയാളികൾ കറിവെക്കുമ്പോൽ ആവശ്യത്തിന് എരിവ് പകരാൻ മുളക് കൂടിയേ കഴിയു. കറികളിൽ അരച്ചും പൊടിച്ചും ചേർക്കുന്നതിന് പുറമേ പച്ചമുളക് അരിഞ്ഞ് ചേർക്കാറുണ്ട്. അങ്ങനെ വീട്ടാവശ്യത്തിന് അരിഞ്ഞു ചേർക്കാറുള്ള മുളക് നമ്മുടെ ടെറസ്സിൽ നിന്ന് നമുക്ക് കൃഷി ചെയ്ത് ഉണ്ടാക്കാം.

                          കടകളിൽ നിന്നും വാങ്ങുന്ന ഉണങ്ങിയ മുളകിൽ ആരോഗ്യമുള്ളവ പിളർന്ന് നടാനുള്ള വിത്തുകൾ ശേഖരിക്കാം. തക്കാളി വഴുതന എന്നിവ നടുന്ന അതേ രീതിയിലാണ് മുളക് ചെടിയും നടേണ്ടത്. പരിചരണവും ജലസേചനവും ആവശ്യത്തിന് നൽകണം. പുഷ്പിച്ച് കായ്ച്ച മുളക് നമ്മുടെ അടുക്കള ആവശ്യമനുസരിച്ച് പറിച്ചെടുത്ത് ഉപയോഗിക്കാം. വഴുതനങ്ങയെ പോലെ പല ആകൃതിയിലും നിറത്തിലും വലിപ്പത്തിലും ഉള്ള മുളകുകൾ ഉണ്ട്. എന്നാൽ പ്രധാന നിറം ചുവപ്പാണ്.

                       വർഷങ്ങൾക്ക് മുൻപ്, ടെറസ്സിൽ നിന്നും ശേഖരിച്ച മൂപ്പെത്തിയ മുളക് നന്നായി പഴുക്കാനായി  തൊട്ടടുത്ത വരാന്തയിൽ സൂക്ഷിക്കാറുണ്ടായിരുന്നു. ഏതാനും ദിവസം കഴിഞ്ഞപ്പോൾ മുളകിന്റെ എണ്ണം വർദ്ധിക്കുന്നില്ല എന്ന് എനിക്ക് മനസ്സിലായി. പരിശോധിച്ചപ്പോൾ ഞെട്ടിക്കുന്ന ഒരു സത്യം തിരിച്ചറിഞ്ഞു, ‘ഞാൻ കൃഷി ചെയ്ത് ഉണാക്കിയ മുളകിൽ വലിയൊരു പങ്ക് എലികൾ തിന്നുതീർത്തിരിക്കുന്നു’. ചെടി നട്ട് വെള്ളവും വളവും നൽകി പരിചരിച്ച് വിളവെടുത്താൽ മാത്രം പോര; ആ വിളവ് നശിക്കാതെ സംരക്ഷിച്ച് പ്രയോജനപ്പെടുത്തണം.

...മുൻ അദ്ധ്യായങ്ങൾ കാണാൻ,  തുറക്കുക,,

ടെറസ്സിൽ ഒരു കൃഷിപാഠം; അദ്ധ്യായം1

ടെറസ്സിൽ ഒരു കൃഷിപാഠം; അദ്ധ്യായം2 

ടെറസ്സിൽ ഒരു കൃഷിപാഠം; അദ്ധ്യായം3